ALERT : ಸಾರ್ವಜನಿಕರೇ ಎಚ್ಚರ : ಶೇರು ಮಾರುಕಟ್ಟೆ ಹೂಡಿಕೆ ಹೆಸರಲ್ಲಿ ಉದ್ಯಮಿಗೆ 16 ಕೋಟಿ ರೂ. ವಂಚನೆ!

 ಬಾಗಲಕೋಟೆ : ಶೇರು ಮಾರುಕಟ್ಟೆಯಲ್ಲಿ ಹೂಡಿಕೆ ಮಾಡಿದರೆ ಅಲ್ಪಾವಧಿಯಲ್ಲಿ ಕೋಟಿ ಕೋಟಿ ಲಾಭ ಗಳಿಸಬಹುದು ಎಂಬ ಆಮಿಷಕ್ಕೆ ಒಳಗಾದ ರಿಯಲ್ ಎಸ್ಟೇಟ್ ಉದ್ಯಮಿಯೊಬ್ಬರು ಬರೋಬ್ಬರಿ 16 ಕೋಟಿ ರೂಪಾಯಿ ಕಳೆದುಕೊಂಡು ವಂಚನೆಗೊಳಗಾದ ಘಟನೆ ಬೆಳಕಿಗೆ ಬಂದಿದೆ. ಈ ಸಂಬಂಧ ಸಿಸಿಬಿ (CCB) ಪೊಲೀಸ್ ಠಾಣೆಯಲ್ಲಿ ದೂರು ದಾಖಲಾಗಿದೆ.

ಘಟನೆಯ ಹಿನ್ನೆಲೆ:

ಬಾಗಲಕೋಟೆ ಜಿಲ್ಲೆಯ ಜಮಖಂಡಿ ತಾಲೂಕಿನ ನಿವಾಸಿ ಯಾಸಿನ್ ಅಲಿಯಾಸ್ ಎಂಬುವವರೇ ಮೋಸ ಹೋದ ದುರ್ದೈವಿ ಉದ್ಯಮಿ. ಇವರಿಗೆ ಕೆಲವು ದಿನಗಳ ಹಿಂದೆ ಸುರೇಶ್ ಮುಂಡೋಡಗಿ ಎಂಬ ವ್ಯಕ್ತಿಯ ಪರಿಚಯವಾಗಿತ್ತು. ಸುರೇಶ್ ತನ್ನನ್ನು ಸರ್ಕಾರಿ ನೌಕರ ಎಂದು ಪರಿಚಯಿಸಿಕೊಂಡು ಯಾಸಿನ್ ಅವರ ನಂಬಿಕೆ ಗಳಿಸಿದ್ದ.

ವಂಚನೆ ನಡೆದಿದ್ದು ಹೇಗೆ?

ವಂಚನೆಯ ಜಾಲ ಹೆಣೆದಿದ್ದ ಸುರೇಶ್, ಉದ್ಯಮಿ ಯಾಸಿನ್ ಅವರಿಗೆ ಅನೂರ್ ಎಂಬಾತನನ್ನು ಪರಿಚಯಿಸಿದ್ದ. ಅನೂರ್ ಶೇರು ಮಾರುಕಟ್ಟೆಯ ನಿಷ್ಣಾತ ಹೂಡಿಕೆದಾರ (Expert Investor) ಎಂದು ನಂಬಿಸಲಾಗಿತ್ತು.

ಅನೂರ್ ಸಲಹೆಯಂತೆ ಹಣ ಹೂಡಿದರೆ ಕೋಟಿ ಕೋಟಿ ಸಂಪಾದಿಸಬಹುದು ಮತ್ತು ಅಧಿಕ ಲಾಭಾಂಶ ಸಿಗಲಿದೆ ಎಂದು ಸುರೇಶ್ ಪುಸಲಾಯಿಸಿದ್ದ.ಈ ಮಾತುಗಳನ್ನು ನಂಬಿದ ಉದ್ಯಮಿ ಯಾಸಿನ್, ಆರೋಪಿಗಳ ಸೂಚನೆಯಂತೆ ವಿವಿಧ ಹಂತಗಳಲ್ಲಿ ಒಟ್ಟು 16 ಕೋಟಿ ರೂಪಾಯಿಗಳನ್ನು ಹೂಡಿಕೆ ಮಾಡಿದ್ದರು.ಹಣ ಕೈ ಸೇರಿದ ಕೂಡಲೇ ಆರೋಪಿಗಳ ವರಸೆ ಬದಲಾಗಿದೆ. ಲಾಭಾಂಶವೂ ಇಲ್ಲ, ಅಸಲೂ ಇಲ್ಲ ಎಂಬ ಸ್ಥಿತಿ ನಿರ್ಮಾಣವಾದಾಗ ತಾವು ವಂಚನೆಗೊಳಗಾಗಿರುವುದು ಉದ್ಯಮಿಗೆ ಅರಿವಾಗಿದೆ

ಸಿಸಿಬಿ ಪೊಲೀಸರ ಮೆಟ್ಟಿಲೇರಿದ ಪ್ರಕರಣ:

ತಮಗೆ ನ್ಯಾಯ ಒದಗಿಸುವಂತೆ ಕೋರಿ ಉದ್ಯಮಿ ಯಾಸಿನ್ ಸಿಸಿಬಿ ಪೊಲೀಸರಿಗೆ ದೂರು ನೀಡಿದ್ದಾರೆ. ದೂರಿನ ಅನ್ವಯ ಸುರೇಶ್ ಮುಂಡೋಡಗಿ, ಅನೂರ್ ಹಾಗೂ ಇತರರ ವಿರುದ್ಧ ಎಫ್‌ಐಆರ್ ದಾಖಲಾಗಿದ್ದು, ಪೊಲೀಸರು ತನಿಖೆ ಕೈಗೊಂಡಿದ್ದಾರೆ.